Osaka 2010 --- Day 1--- 28/03/2010

香港 -> 關西空港 -> 道頓堀

04:00已經出門口，04:30要到巴士站搭通宵巴去機場，05:30就到機場了，搭07:30嘅印航機，事前上網睇過印航出名Delay，我哋都心裡有數，結果真係Delay到10:50先登機，11:30先起飛。

班機係由印度經香港到大阪架，所以都有唔少印度人，好在聞唔到有咩異味，機倉有少許舊，無計啦，要平嘛，但還可以接受。

飛機餐有兩款，雞同羊，我揀咗雞，梁小姐揀咗羊，個雞係咖哩雞，好辣，可能係我唔食得辣，個羊都幾羶。

眨吓眼就到關西空港，入境過關都幾快。一攞咗行李就走去Information Center買車票，當然呢啲咁重要嘅事，梗係由最可靠嘅梁小姐做啦。我哋買咗「大阪出張きっぷ」係包一程南海電鐵+市營地鐵一日券 http://www.nankai.co.jp/traffic/otoku/trip/index.html ，經過一輪轉車後，終於去到東橫Inn梅田東店，地鐵 堺筋線 南森町站出行一分鐘就到，附近有超市、有松屋、有Mos Burger，非常方便。

Check-in完都六點幾，係時侯去搵食，今晚嘅目標係心齋橋嘅「若狹家」，行咗好多路，問咗好幾個人，終於都到了。我叫咗個「潮騷丼」加大盛，梁小姐叫咗三文魚、蟹棒、甜蝦丼。以我咁喜愛食壽司飯嘅人，當然係一點都不能剩啦。

食完就向附近行吓，去到蟹道樂，梗係要食番隻燒蟹腳啦，但認真麻麻。

返到酒店附近，去咗超市行吓，非常靚，好似Citysuper咁，結果我哋買咗煙三文魚同甜蝦箱押，三文魚有啲腥，用嚟送清酒會幾好，個箱押就超好食，無得頂，蝦又多，好似蝦膠咁，好黏，正呀!!