大阪城 -> 門真南Outlet -> 通天閣 -> 通頓堀
今日係喺大阪嘅第二日，08:30起身，09:00落樓下大堂食早餐，早餐係自助同任食嘅，至到10:00完，所以唔可以咁晏起身。食物方面，雖然唔係太多款式，但一啲都唔差喎，有四款飯團、薯蓉沙律、麵豉湯、咖啡、茶、鮮奶，全部都啱我口味。
10:00準時向大阪城出發，今日用嘅係大阪周遊卡， http://www.pia-kansai.ne.jp/osp/cn/index.php ，呢個Pass非常之抵。今日有啲凍，當然我唔覺啦，係梁小姐凍，雖然係天朗氣清，我非常喜歡呢啲天氣，又有太陽，又有啲涼。去天守閣就一定要經過大阪城公園，充滿櫻花樹嘅公園，可惜係因為天氣凍，所以未開晒。天守閣入面有八層，有兩條樓梯，一條上，一條落，所以要上到頂先開始睇，只係得樓梯，所以腳骨力係一啲都無得慳嘅，頂樓係觀景台，其他係講豐臣秀吉嘅歷史，早當我哋決定去大阪嘅時候，我就開始上網睇大阪嘅歷史，所以秀吉嘅事跡我都有啲印象。
離開大阪城後，我哋再向下個Checkpoint --- 門真南Outlet，我竟然買到衫同袋。
之後我哋去咗新世界嘅通天閣，雖然觀景台唔係好高，我估有十幾樓啦，但係都一望無際，真係百看不厭。睇完靚景，梗係要做啲遊客嘢啦，影吓相，買吓手信。
離開通天閣後就返咗酒店放低啲手信，之後就出去覓食了。我哋去咗道頓堀，行咗好耐(好似係因為要搵一間食店，但係搵咗好耐都搵唔到)，當時我哋兩個隻腳都攰到無知覺了，非常肚餓，梁小姐又覺得好凍，所以我哋決定行多一條街，見到食店就入去啦，當行到差不多街尾，仲未有食店喎，當大家都諗住失望而回之際，竟然見到一間拉麵店，我哋第一時間入去，已經無考慮過好食與否，就坐低叫咗兩個拉麵同一份煎餃子，唔知係咪太肚餓呢，我覺得好好味。
沒有留言:
張貼留言